Cafodd Fay Jones AS ei hethol yn Aelod Seneddol dros Frycheiniog a Sir Faesyfed ym mis Rhagfyr 2019.
Ganwyd a magwyd Fay yng Nghaerdydd ac aeth i ysgol gyfun leol cyn astudio Ffrangeg yng Ngholeg y Brenin, Prifysgol Llundain.
Yn 18 oed, gadawodd Fay ei chartref a symud i Frwsel i weithio i Jonathan Evans ASE (cyn-AS dros Frycheiniog a Sir Faesyfed), cyn symud i Lundain fel ymchwilydd i David Jones AS yn ystod ei chyfnod yn y brifysgol. Ar ôl graddio, swydd gyntaf Fay oedd fel ymchwilydd i'w Uchelder Brenhinol Tywysog Cymru.
Yn 2012, symudodd Fay i Adran yr Amgylchedd, Bwyd a Materion Gwledig i ymuno â thîm negodi'r DU ar ddiwygio’r Polisi Amaethyddol Cyffredin yn 2011. Gan weithio'n agos gyda'r sector ffermio, ei gwaith oedd ennill cefnogaeth i amcanion ac uchelgeisiau'r DU. Ar ôl hynny, ymunodd Fay ag Undeb Cenedlaethol y Ffermwyr, gan dreulio bron pum mlynedd yn gweithio dros ffermwyr y DU, yn cynnwys swydd tair blynedd yn swyddfa'r NFU ym Mrwsel. Yn ystod y cyfnod o ail-negodi a'r refferendwm, sicrhaodd Fay bod Aelod-wladwriaethau Ewrop yn clywed llais ffermwyr y DU.
Daeth Fay yn ôl i Gymru yn 2017, a nawr mae'n byw y tu allan i Grucywel. Yn ystod haf 2019, gwirfoddolodd Fay i gyd-drefnu ymgyrch arweinyddiaeth Boris Johnson yng Nghymru, gan greu ymchwydd o gefnogaeth i'r Prif Weinidog presennol.
Y tu allan i fyd gwleidyddiaeth, mae Fay yn frwd am ymarfer. Roedd gynt yn llywiwr gyda Chlwb Rhwyfo Twickenham, ac mae wedi cyflawni sawl hanner marathon a thriathlon i gefnogi elusennau. Yn 2014, rhedodd ym Marathon Efrog Newydd er budd Prostate Cancer UK – gan godi dros £10,000. Mae Fay yn gogydd amatur brwd ac mae wrth ei bodd yn coginio i deulu a ffrindiau – mae'n arbennig o hoff o ddefnyddio cynnyrch lleol enwog Brycheiniog a Sir Faesyfed.